Pfälzer Mundart: Pälzer Owend von Manfred Dechert

Pälzer Owend

von Manfred Dechert

Wie ruichs heit is

Um mich rum so ruich

Die Höf sinn leer

Kää Auto fahrt vebei

Die Vechel sinn runnerkumm

Unn hocke uff de Trapp

Uff meiner Schulter

Uffem Gras

Die Mamme aussem Fenschter

sat:“Sie kumme glei“

Unn die Leit am Fenschter

unn uff de Trapp

Es so ruich heit so ruich

um mich rum

Die Schtern so tief so tief

E Schternenacht am frihe Owend

So leer so leer die Wertschaft

Känner lacht mi gucke tun

die Leit unn ich uff meiner Schulter

e schwarzer großer schwarzer Vochel

Die Mamme aussem Fenschter

Sie kummen die Fraa gecheniwwer

Ach Gott holen alles bei

Sie kumme vun weit her

Sie wollte zu uns doch sinn ertrunk

Die Leit aus de Nachrichte

Heit owend hanses gpackt

Gebne Wasser gebne Brot ruft die Mamme

unn die Leit trete uff die Schtroß

Ach Gott des sinn Leit wie Du unn ich

Unn die Leit uff de Schtroß

heile vor Frääd um mich rum

heile die Leit unn de Vochel uff meiner Schulter:

„Des is Dei Wunsch mei Freind – e Owend

E Welt wo sich veschteht“

Du haschse nie vestann Du haschse net gsieh

Unn de Zuch geht widder weiter

Sie han bloß am Rand ghockt e Schild vor sich

Sie han bloß dehem gheilt

unn die Leit trete uff die Schtroß

Ach Got des sinn Leit wie Du unn ich

Unn de Nochber wo nie geredt hot

sat daß er so was noch net gsieh hot

So e Schtern tief unn so e Gfiehl in sich 

Mer hocke zamme in de Gäärde

Unser Dote ruft die Mamme

Unser Dote do kummese

unn Leit san sie han seit dreißich

Johr widder heile kenne

Awwer vor Glick unn kää Kriech

nemmt Der was unn de Owend

gebt Der was Dei Arm Dei Bää

Solang schun velor domols

Wie ruichs heit war

bevor se kumm sinn

Wie schääs heit war

als se kumm sin

Vun weither unn aus de Gräber

unn vun de Schterne

E Welt wo sich veschteht

Alles Uglick hot sei End

Wann ich weiterflie

is Dei Dram vebei

Sat de schwarz Vochel

Ach bleib doch noch